- ضاع منى عمرى -

ضاع منى عمرى اللى فات واللى جاى
مات منى قلبى وانا لسه حى
قام شاكى قلبى ليا .... قلتله متخافش

لو مكنش ليك العمر ده.. احتمال يبقى العمر اللى جاى

متخافيش يحصلى ايه من بعدك

قبل اما تنهى كل حاجه قبل اما تنسى كل حاجه
لسه قلبى شايل ليكى عندى حاجه
لسه حاسس برده انك كل حاجه
مش قادر اغفر لنفسى انى ضيعتك من ايديا
مش قادر انسى انك كنتى ممكن تبقى ليا
بعدك مابقتش احس ان حد بيخاف عليا
كل يوم يمر من غيرك يموت حاجه جديده فيا

لو فى ليله فكرتى فيا افتكرى اى لحظه كانت ما بينا الا ديا
قبل اما تمشى سيبينى اسرح لاخر مره قدام عينيكى
سيبينى اسرق من الزمن اخر لحظه ما بين ايديكى
لو كنت اعرف ان اللحظه دى ممكن تكون
مستحيل يا حبيبتى ابدا كنت اخون
اصل بعدك مش هلاقى حد احبه زيك
وان لقيت يبقى عشان فى حاجه منك
اسف حبيبتى لكل شئ عملته ليكى
ده انا يوميها جرحت نفسى بجرحى ليكى

متخافيش يحصلى ايه من بعدك
دى الحياه من بعدك انتى متساويش
وان سمعتى فى يوم انى مت ما تزعليش
ده اللى فرط فيكى مره ما يستهلش انه يعيش

- كويس برده ان انا قلتلها -

ليه ياقلبى تقول على اللى مخبيه
ماطول عمرك خجول اشمعنى المره دى
من غير ما اقول كان كلامى يوصل ويتحس بيه

واهى طلعت مش حاسه بيك ولا داريه بالى انت فيه
من الاول انا قلت ليك البنت دي مش ليك

مش كل حد حب ... التانى كان دايب فيه
دور على حب جديد دانت مش اول حد يسيب حبيبه ويعيش بعديه

ياما قبلك ياما كتير ناس اتجرحت وهنعمل ايه

ما الحب كده دايما يقسى على كل حبيب

ويخليك مهما تقابل كده لسه غريب

لا بكره هتنسى الحب ده وتحب جديد

ماهو مش معقول راح تفضل باقى العمر وحيد

وكويس برده ان انا قلتلها
منا لازم كنت اعرف مشاعرها والموضوع كده لسه فى اولها

قبل ما كنت اتعلق اكتر

قبل ما الحيره كات تقضى عليا والفكر يجيب ويودى كده فى لياليا

اه برده الدنيا كات قاسيه عليا ومين فينا الدنيا دى ماقاستش عليه
انا قلبى وجعنى من رفضها ليا مش لاقى كلام يوصف ايه فيا

وتلاقى كتير مش حاسس بيا

عمال بيقول دى حاجه عاديه

لا بكره تغير رايك فيا

لما هتمر بالتجربه ديا

وانا خايف برده لاحب جديد واطلع من الجرح على جرح جديد

وكمان خايف اعيش على زكرى يومين حلوين

والليل عليا يطول ويفوت عليا سنين

وانا لسه بيها مشغول وشايل ليها الحنين
لا كده بقى مش معقول

افضل فى حيره علطول

الحب ده ايه ده انا ياما قبلت وشفت الحب فى عيون كتير قبلها

لكن عمر ما حد ابدا شغلنى قدها

ماختش بالى بجرحهم الا لما كنت فى حكايه زيها

ولا حسيت انى بهدهم الا لما سمعت لا منها

حاسس كانى خلاص مش هقدر اكمل بعدها

ازاى يا قلبى قلتها مش كنت تاكد بعدين تقول بعدها

بس حيرتى كات يمكن تطول او غيرى جاير كان منها ينول

كويس برده ان انا قلتلها

منا لازم كنت اعرف مشاعرها والموضوع كده لسه فى اولها

قبل ما اتعلق بيها واتوه ويبقى البعد صعب عليا

لا كده انا جرحى اخف شويه

انا رافض اسال عنها تانى

وهضير وشى ان شفتها تانى

منا لازم انساها زى ما نسيانى

ده كلام وخلاص بتصبر بيه

مش عارف اعمل غير كده ايه

ده انا لما بشفها بتروحلها روحى

وهيا معديه بتشفيلى جروحى
وافضل متابعها على مدد الشوف

وبحس كانى من الكون مخطوف

وافضل على الحال ده على بال ما تغيب

وبحس كانى من الفرحه قريب

وفى لحظه افوق واتمنى تعدى قدامى من تانى

وارجع من تانى احلم من تانى بحب هيملى عمرى وزمانى

ليه يا قلبى تقول على الى مخبيه ماطول عمرك خجول اشمعنى المره دى

مش جايز لو طولت شويه كان يمكن مره حست بيا

مش قادر اتخيل انها مش ليا

كان لازم اقول احساسى بيها

ماقدرتش تانى اخبى عليها

وكويس برده ان انا قلتلها

منا لازم كنت اعرف مشاعرها والموضوع كده لسه فى اولها

قبل ما تعلق بيها واروح وافضل عايش كده مجروح

لا عين العقل ان انا قلتلها

من غير سبب

حاسس قلبي حزين من غير سبب
ولا يمكن كترهم خلاني ما عرفت السبب
يمكن عشان سنيني من بين إيديا اتسرسبت
ولا عشان غرامي اللي مات من قبل حتى ما يتولد
ولا يمكن وحدتي اللي كانت زى أوضة مضلمة بتضيق عليا كل ما بحاول اعترض
ولا يمكن على صاحب باعني زمان بأرخص تمن
خلاني أكره اليوم اللي عرفته فيه والزمن
بتفوت عليا ليالي طويلة زى ما تكون جبل
أطلعه وانزله علشان ألاقي قدامى من تاني جبل
ولا يمكن عشان شايف رحلتي من غير هدف
***********
ساعات بحاول افتكر أي زكرى حلوه أنا عشتها
عشان أصبر نفسي في رحلتي
ملاقيش غير ليالي طويلة لوحدي أنا عشتها
مش عارف فايدة شكوتي
مش عارف ليه المرة دي بس القلم كتب
يمكن كلامي بيهون عنى آلامي
يمكن بلاقي سلوتي في شكوتي
ولا لنظرة عطف مستني
ولا عشان أخلي الكل زيي يتوجع
خلاص تعبت من رحلتي وخارت قوتي
*************
حاسس قلبي حزين من غير سبب
دايماً بلاقي نفسي في وحدتي يمكن هي دي بس حتتي
بقى صعب تاني الضحك على وشى يترسم إلا على نكته بايخة ولا لواحدة بتترسم
أوقات بحاول أرسم زكرى تهوَّن عليا رحلتي وأبقى افتكرها في لحظات وحدتي
أرسم ضحكة من بنت حلوه على كلمة أنا قلتها خلتها تنسى الدنيا وفى الآخر سبتها
ولا أرسم فسحة حلوة رحتها وأحلى لحظات عشتها مع بنت تانية برده أنا سبتها
وأبدأ أعاتب نفسي على البنت ليه سبتها أو أحاول أعرف حتى اسمها
حتى زكرى كدابة تفرحني ولو ثواني مش قادر أنهيها نهاية حلوة علشاني
************
يمكن أكون متشائم بشوف الدنيا لون غامق
يمكن تكون نظرتي سوده
يمكن حياتي بأحزاني موعودة
يمكن حياتي إتملت بآهاتي
يمكن بلاقي الحزن ماليني
ولا يمكن تكون أيام وهتعدي
وأصبح ألاقي الفرحة في عيوني
وأنسى ليالي الحزن وظنوني
وأفرح وأعيش الدنيا بجنوني
بس الألم جوايا قاتلني
خايف لتيجي الدنيا تحلالي ألاقي الحزن في نفسي ما ينساني
خايف أكمل باقي العمر على حالي من غير ما أعيش ولا لحظة تحلالي
حبي لحياتي قل لدرجة بتموت خايف أكمل رحلتي على ده الحال وأتعود
يا اللى قريت كلامى تقدر تقولى الحل ايه علشان افرح نفسى من تانى
ولا انت برده قلبك حزين او اصبح حزين بعد ما عشت الامى
حاسس قلبي حزين من غير سبب ولا خلاص أسبابي كتبتها أقلامي

الحب بهدله خلى ايديا متعوره

قصه حبى الاولى والاخيره فى اخر سنه ليا فى الكليه السنه الى عشت فيها اسعد واتعس لحظات حياتى يلا الله يمسيها بالخير
كنت تايه مش عارف مشاعرها ايه قلت اكتبلها حاجه بتعبر عن اللى جوايا واديهالها عشان تقراها والحمد لله كتبتها
بس مااديتهلهاش_ايه الكلمه الصعبه دى_

الكلام ده ليكى يا لولا يا ترى انا فى بالك فى اللحظه دى زى ما انتى فى بالى ؟؟؟؟




من لحظه لقؤانا وانا مشدود ليكى معرفش ايه حاببنى فيكى
مش عارف ان كنتى حاسه بيا ولا لا طب قوليلى ان كنتى عارفه ولا لا
ايوه انتى بقيتى مره واحده كده كل عمرى وحياتى
والثوانى الى كنا فيها ويا بعض بتبقى عمر فى زكرياتى
اى ضحكه اى همسه اى لمسه كانت ما بينا هى دى كل حكاياتى
سيبك انتى من الى حاسه واللى بيا
انتى شايفه حاجه فيا
حاسه حاجه فى قلبك انتى ليا انا
ولا زيى زى غيرى وتلاقيكى حتى مش فاكره مين انا
ولو كنتى حاسه حاجه او عايزه تقولى حاجه اعرف منين انى على البال
ان جايز نكون لبعض وده شئ ممكن مش محال
حاولى تقوليلى اى حاجه توصليلى ان الى بينا مش خيال
حاجات كتيره تعمليها وادى المثال
نظره صافيه ضحكه رايقه واحنا مره ويا بعض
لما تشوفينى بمسح جبينى بايديا ادينى مثلا منديل ورق
لما نكون فى محاضره جنب بعض الاقيكى بتشدى الكرسى بتحاولى تقربى قال ايه مش شايفه الورق
او حتى توطى تجبيلى لبيسه القلم صدقينى واقل من كده راح يمحى عندى الالم
اى حاجه تديهالى ان شاالله حتى نعنايه صدقينى اقل حاجه راح تفرق معايا
اى حاجه تعمليها ان شاالله حاجتى توقعيها
او فى مره تندهيلى تسالينى رايى ايه فى لبسك انتى
او فى مره تاخدى حاجتى وتكون فى ايدك وتقوليلى لا مش انتى
ولا اقلك حاجه تانيه اسهل من ده كله
زودى نظراتك ليا على الهيفا كده تبصى عليا
او وانتى ماشيه تسلمى وتتكى سنه على ايديا
بس المهم افهم او احس اى حاجه منك ليا انا
او لما تلاقي عينى عليكى تضحكى او حتىتبتسمى بعنيكى
راح افهم ان الغرام الى فيا هو برده فيكى او حتى على الاقل حاسه باهتمامى ليكى
اسالينى مثلا امبارح كنت بعمل ايه فى حياتى
او اسالينى على حد من اخواتى
واوعدك أول ما احس باى حركه باى همسه تدينى الامان
هاقدر اصارحك بكل حاجه بحس بيها من زمان
ايامى بتعدى وانا خايف لتضيعى من ايديا علشان كسوفك او حتى خوفك لتبوحى بمشاعرك
لا يا عمرى تبقى غلطانه انى كنتى فاكره ان مشاعرك دى حاجه غلط
قتل المشاعر من قبل حتى ما تتولد هو ده اكبر غلط
بس لو حاسه بحاجه حلوه راح تبقى بينا قوليلى قبل ما افقد الامل
بعد كل اللى قلته واللى شرحته معرفش بعد كده راح يبقى ايه العمل
صدقينى انا شايف فيكى كل مستقبل حياتى والحياه من غيرك انتى يبقى اسهل فيها تدينى شهاده وفاتى
لو يعدى الف عمر عمرى ما هقدر اتغلب على الجروح الى بيا
لو الزمن فكر ونفذ وقرر القسوه عليا
عمرى ما هقدر انسى انك كنتى ممكن تبقى ليا وعشان حاجات عبيطه ضيعتك كده من ايديا
لسه مش فاهمه المغزى من الجواب لسه مش حاسه انى فى عذاب
لسه مش فاهمه الى بيا لسه مش حاسه الى فيا
ايوه قصدى عليكى انتى هو فى ارق منك انتى
كل تاخيره بحس كانى ببدا من البدايه بس اهم حاجه تاخدى بالك من الوصايه
اه يا حد تعالا بقى مش قادر استنى كل حد يفوت واقابلك كانى كنت فى الجنه
بس هو السكشن مش ناويه تحضريه قوليلى بس عشان لو كده مرحش تانى ليه
يمكن بعد كده نفتكر مع بعض تفاصيل الحكايه ونكملها لبعض حته حته من البدايه
راح ااكد عليكى تانى ماتنسيش الوصايه
ولا اقلك حاجه تانيه ارجعى اقرى من البدايه
وانتى بتقرى كده واحده واحده عشان تفهمى الحكايه
بس لو بعد كل ده ما طلعتيش بحاجه
او لو فاكره ان كل ده شطاره فى الكتابه
يبقى العيب فيكى يا حبيبتى مش فيا انا
ياريت تحسى ان اللى بيحبك انا
هو انتى ايه ده لو قلبك حجر كان رد مره عليا انا
بس اكيد عيونك انتى راح تفهم مرادى
وتعرف ان كلامى ده ماطلعش لاى حد عادى
بس ساعه لما شفت ملاك قصادى
بس فى حياتى ما قابلت واحده زيك انتى فى الهروب
تقليش بحب شويه سكر وكل مره الاقيه منى يدوب
بس انتى سكر والله سكر ده بس كسوفك انتى بيحسسنى ان الدنيا اجمل
بس مش معنى ان انتى سكر راح اسيبك تدوبى فى قلبى ممكن غير كده راح تظهر عيوبى
الخلاصه من ده كله انى دايب والله فيكى سواء عملتى حاجه من الى وصيتك عليها او نسيتى
يعنى ميه ميه راح اوصل حبى ليكى يبقى تريحينى وتوصليلى ان الى حاسه فيا ده برده فيكى
معرفش اقول تانى ايه علشان قلبى تحسى بيه
مهما اقلك على اللى فيا صعب برده تحسى بيا
مهما اكتب من كلام لسه برده مش كفايه
انا لو كتبت الف صفحه برده مش هاوصل للنهايه

هااا وصلت رسالتى ولا لسه حبه عايزه تستنى شويه لما تزيد المحبه
لا يا بنتى ده اخر ترم ليا يعنى لازم باقصى سرعه تحسى بيا
انتى مش واخده بالك ان الكلام ده كله ليكى وان عينى كده دايما عليكى

ايوه انتى انا قاصدك انتى يااللى بتقرى الورق ارجوكى ردى بسرعه عليا قبل ما يقتلنى القلق
لو رفضتى ما تصارحنيش بالحقيقه عندى اهون من الحقيقه انى اموت الف مره فى الدقيقه
وان وافقتى و كان مانعك كسوفك من الكلام البسيلى حاجه غامقه المحاضره الجايه
اصل الغوامق بتليق عليكى
بعديها راح افهم اكيد ان انتى ردك بالقبول
وحياتى الى جايه راح تبقى حلوه علطول
وساعتها راح يزيد جنونى بيكى
واحتمال اشيلك والف بيكى
ماتخافيش دى بس كلمه عشان اوصلك فرحتى بيكى
ها يا عمرى اقول تانى ايه بعد الى قلته
اقول بحبك اوى وعايزك اوى ونفسى اشوفك النهارده قبل بكره
نفسى حبى ليكى يبقى اكتر من انه زكرى
ليه بس مش حاسه بحبى ليكى
ولا يمكن حاسه وخايفه يبان عليكى

ده انا عمرى ما حسيت حاجه كتبتها زى المره دى
وازاى احبك كل الحب ده وماتحسهوش
ده انا نفسى اقلك كلام كتير مقلتهوش
جوايا حب وشوق فى قلبى مايخلصوش

اقلك حاجه تانيه
انا عمرى ما كنت بحضر ماده زى الماده اللى انتى فيها
مكنش ليا فى الحضور
بس كان ليا فيكى
يمكن اكون طولت عليكى بس ده عشان حياتى بايديكى
يمكن كلمه بحبك بطول الورقه كانت كفايه
يمكن تسالى نفسك ليه ما قلتش على اللى بيا من البدايه
بس خفت لاخسرك
خفت لتقولى عليا لعبى وتفتكرى ان بضيع وقت فى النهايه
بس فى الاعاده دايما افاده ومهما حصل ماتنسيش حبى ليكى واحتفظى بكلامى ليكى
سواء رفضتى او قبلتى حبى ليكى مش هقدر انسى لحظه ضحكه عينيكى
بس وحياه اغلى حاجه عندك ما ترفضيش
وان رفضتى ما تبعديش
وان بعدتى ماتنسنيش
فى الحاله دى.... ما اقدرش اعيش

اللى راح مش راجع تانى

قمت من النوم والتصيره حذقانى
رحت اتصير ورجعت فى ثوانى
بس مين اللى يجيله نوم
ده اللى راح ما بيرجعش تانى